Дапаможнік «Беларуская мова як замежная : практыкум для кітайскіх навучэнцаў 对外白俄罗斯语实践教程» (аўтары – Г.М. Валочка, В.В. Шахаб, К.С. Шахаб-Касцецкая, Фу Мэйянь, Лю Івэнь, Лю Цінчунь) выйшаў з друку ў выдавецтве “Адукацыя і выхаванне” ў канцы 2024 года. Ён падрыхтаваны беларуска-кітайскім калектывам Акадэміі адукацыі сумесна з Цяньцзінскім ўніверсітэтам замежных моў і з’яўляецца трэцім у серыі вучэбных выданняў для кітайскіх студэнтаў па розных аспектах навучання беларускай мове.
Практыкум прызначаны для фарміравання (удасканальвання) у кітайскіх навучэнцаў моўных (фанетычных, лексічных, граматычных) навыкаў. Моўныя навыкі з’яўляюцца як мэтай, так і сродкам для рэалізацыі камунікатыўнай кампетэнцыі. У якасці сродку яны прымяняюцца ў навучанні замежных навучэнцаў у практыкаваннях, накіраваных на набыццё навыку выкарыстання моўных сродкаў ва ўласным маўленні.
Практыкум уключае: тэарэтычныя матэрыялы (правілы, табліцы, схемы, алгарытмы разважанняў і інш.); дыдактычныя матэрыялы (практычныя заданні, практыкаванні, тэксты і інш.); дыягнастычныя матэрыялы (рознаўзроўневыя пытанні, тэставыя заданні) для самакантролю.
Дапаможнік прызначаны для кітайскіх студэнтаў-беларусістаў і ўсіх зацікаўленых.
